كتبت : منة اسلام
أثارت نهاية مسلسل لا ترد ولا تستبدل الذي قام ببطولته كل من أحمد السعدني ودينا الشربيني و الشاب الصاعد حسن مالك و فدوى عابد حالة من الجدل ، حيث قدمت الحلقة الأخيرة من المسلسل نهاية غير منطقية فكيف لطه الذي يقوم بدوره أحمد السعدني يحب سيدة متزوجة ويمنحها كليته التي تعتبر جزء من ثمين من كليته خاصة أنه من أسرة فقيرة ويعول كل الأسرة ثم يترك ريم التي تقوم بدورها دينا الشربيني ولا يتزوجها خاصة أنها أصبحت فقيرة مثله ولا تملك أي شيء خاصة بعد طلاقها من زوجها.
تصوير الخيانة الزوجية بأنها شيء مباح
اثارت علاقة ريم وهي دينا الشربيني المتزوجة من صدقي صخر باحمد السعدني اشمئزاز البعض الذين قالوا إنها فكرة تدس السم في العسل وتبرير إقامة أي سيدة متزوجة علاقة حب مع شخص آخر وتصوير الخيانة الزوجية بأنها شيء مسموح لتدمير قيم المجتمع وتفكيك وحدة الأسرة كما أن دور الزوج في المسلسل بأنه بخيل غير محب لزوجته رافض للتبرع بكليته لزوجته الغرض منه افساد العلاقات الزوجية .
تناقض في الآراء
والان نعرض بعض الآراء لأشخاص التقت بهم بوابة اخر ساعة:
يقول عمرو جلال :
النهايه غير منطقيه
لا يوجد ف الحياه تضحيه كده بلا مقابل معادا للاب و الام
كان لازم يعترفلها بحبه و الاحلي انها توافق و يكملو سوا
اما فكره انه ضحي عشانها و ادالها الكليه و دفع فلوس المستشفى وًكمان معترفش بحبه و مكملوش
نهايه غير منطقيه
كان ممكن نقطتين ف اخر حلقه:
-اخوه يدخل المستشفى و حالته تبقي ميؤس منها و يفكروا يتبرعوا بكليته و ده كان هيفتح الموضوع ده للنقاش
-حتي اذا معترفلهاش بحبه ومكملوش سوا
فكان لازم الحوار التالي
هو يقلها الانسان بيضحي عشان اللي بيحبه بس بيحتاج يلاقي المقابل
بس انا معاكي المقابل خته و هو ان انتي بقيتي كويسه و سعيده
بينما تقول أميرة مصطفى :
نتجوز واحد عشان نردله الجميل يعني !!
هو اختار بإرادته و ماحدش اجبره
هو ماعندوش ١٠ سنين يعني
و هو بيعمل ده و عارف انهم مش هيبقو سوا
دي تضحيه كبيره منو و مكانش مستنيلها مقابل
غير ان صحتها تتحسن
و في نقطه واضحه جدا بيبينو الفرق بين نادر و طه
نادر وقف عنها التأمين عسان رفضت تكون معاه
كأنه كان هيقدم مساعده بالشكل ده في حاله انهم هيكونو مع بعض بس و لو هي رفضت هيسيبها تحتاس و تموت
طه قدم الفلوس و الكليه مقابل انها تعيش حتي لو مش هتعيش معاه ولا يتجوزو بس تعيش في العموم
المنظور هنا انساني و بيحاولو يبينو وجهه نظر هل الانسانينه مرتبطه بالمصلحه ولا لا
تقول عائشة السيد:
المشكلة فى طه مش انه فقير الفقر عمره ما كان عيب يعنى لو كان فقير وعلى مستوى تعليمى وفكرى زيها واهله ناس فقيرة بس راقية فى نفس الوقت كان ممكن لكن ده اخوه حرامى ومتجوز واحدة بتسلف بالربا العيلة بيئة متدنية غير عيلتها..لكن لو فقير واخوه متعلم وناس راقية ماشى ياااما ناس فقيرة واخلاقهم وتربيتهم احسن مليون مرة من ناس غنية ..الفكرة مش فقر وغنى خالص
يقول عصمت فرج: مسلسل بين ناس كتير اوي من تعليقاتهم و بوستاتهم للأسف!!
نادر راجل عادي موظف محترم و طبيعي اه يمكن مش رومانسي و مش بيتنحنح زي طه، و مراته من أول حلقة بتتعامل معاه بكل عجرفة و ندية و هو مقابل كل ده بأسلوب محترم و يطلع ناس ضده!!
و كل الستات مدعي الفهم و انهم بيفهموها و هي طايرة مفروض فاهمين ان طه داخل يتسلل من الأول عشان ينال رضا الأستاذة، و الأستاذة فاهمة و الأستاذة متزوجة و رغما عن كده تنازلت عن وضع أي خطوط لا و كمان اعطته من التعاملات الأنثوية و الرقة و التغاضي احيانا ما لم تعطيه لزوجها الشرعي!!
الفرق كان كبير اوي لما نادر أشترى ماكينة القهوة الجديدة عشان عارف انها بتحب القهوة و اكيد كان متوقع من مراته انها تقوله شكرا ياحبيبي و تسلم ايدك و تفرح كأي ست طبيعية، ولكنها حولت الموقف لأنه بيضايقها عشان هي اتعودت على القديمة و مش عارفة تستخدم الجديدة و قلبت الدنيا على دماغه!!
طيب نروح نشوف سوا بقى تصرفها مع ساندوتش الجبنة بتاع طه و اللا طبق الكشري و اللا السلسلة الفالصو و انها توصل له انه عمل انجاز تاريخي و انه جابلها حته من السماء، هو ده اللي كان مفروض يوصل لنادر مش لطه!! فين الحلو اللي قدمته ريم لنادر طول المسلسل ؟؟
ناس مصممة انه هو اللي يتبرع مع انه مش فرض عليه و هو ما شاف منها شيء يخليه يعمل كده و هو عارف انها بتتعامل معاه مش احسن شي و ممكن اصلا تنفصل عنه عادي!! و بالرغم من كده ما سكت و كان بيدور على متبرع و كان عامل التحليل و مخليه كأخر اختيار ان اغلقت كل السبل و قطعه لما لقوا المتبرع و راح دفع فلوسه و اتنصب عليه و اتضرب و اتحبس بسبب سوء تفكيرها وانها كالعادة مش سامعاه!!
ومن اكتر اللحظات اللي تبين ان الناس اخلاقها محتاجة اعادة نظر، ان الناس تعاطفت معاه لما قال هسيب التأمين بعد الطلاق!! اللي هو قانونا و شرعا سرقة و حرام يا جماعة الخير!! يعني اللي داخلة تعمل عملية بين أدين ربنا دي بتعملها بفلوس حرام شرعا دينيا و تصرف يعاقب عليه القانون دنيويا!!
أمور كتير محتاجة مراجعة و الرجوع الى الله فقط و التعامل بما يرضي الله… و اللي شاف نفسه تعاطف مع شي غلط أو حرام لازم يراجع نفسه!!
